മഷിത്തണ്ട്

ബ്ലൂ ടൂത്തിലൂടെ പരിചയപ്പെടുന്ന പെണ്‍കുട്ടികള്‍

2012-01-13T15:10:00.001+05:30

ഇവിടെ നമുക്ക് ചുറ്റും തന്നെ ഉണ്ട് ,
തിരക്കില്‍ പാഞ്ഞു പോകുന്നതിനിടെ
ഒന്ന് ശ്രദ്ധിച്ചാല്‍ മതി

തുണി ക്കടയിലും, മെഡിക്കല്‍ സ്റ്റോറിലും
ബസിനുള്ളിലും, എന്തിനു
തെരുവിലേക്ക് തുറക്കാത്ത ജനാലകളുള്ള
ചില വീടുകളിലടക്കം ..

പിന്‍കഴുത്തിലെ കാക്കപുള്ളി , മാറിലെ മുറിഞ്ഞ പാട്
വയറിനു താഴോട്ടു പോകുന്ന മറുക് , അങ്ങനെ
താനറിഞ്ഞതും അറിയാത്തതുമായ രഹസ്യങ്ങളെല്ലാം
പരസ്യമായവര്‍

ഒരു തിരിഞ്ഞു നോട്ടത്തില്‍ ചൂളി പ്പോകുന്നവരാണ്
ഏറെയും
ആരെങ്കിലും തിരിച്ചറിഞ്ഞാല്‍
മൌനിയായി കണ്ണുകളില്‍ നീല വിഷാദം നിറച്ച്
തല കുനിച്ചു മാറി നില്‍ക്കുന്നവരോട്
എന്ത് പറയാന്‍ ?!!
എങ്കിലും
നാക്ക് ചൊറിഞ്ഞു വരാറുണ്ട്
കണ്ടതൊന്നും എന്നെയല്ല എന്നാ മട്ടില്‍
ദഹിപ്പിക്കുന്ന നോട്ടവുമായി നില്‍ക്കുന്നവരോട് ..!!

പിന്കുറിപ്പ് :
പുതുവര്ഷ പ്രതീജ്ഞയിലെ , ഒഴിവാക്കപ്പെടേണ്ട
ദുശ്ശീലങ്ങളില്
എത്രാമത്തെയാണു നിനക്ക്
ഞാന്..

രാത്രിയൂണ്‌

2011-12-29T15:06:00.005+05:30

അനിയത്തിക്ക് പൂവിന്റെ ചിത്രമുള്ള തളികയില്‍
ഒരിത്തിരി ചോറും കറിയുടെ കഷണങ്ങളും മാത്രം .
രണ്ടു കയ്യ് കൊണ്ടും ഒരു പോലെ കുഴച്ചു
കാക്കയ്ക്കും പൂച്ചയ്ക്കും അമ്പിളി മാമനും കൊടുത്ത്
കഥ പറഞ്ഞും അങ്ങനെ ..
(അമ്മ തന്നെ ഉരുളയാക്കി കൊടുത്താല്‍ സന്തോഷം..!! )

ഏട്ടന് വൃത്തിയാണ് പ്രധാനം , അഴുക്കിന്റെ
ഒരു പൊടിയെങ്കിലും കണ്ടാല്‍ പിന്നെ പാത്രങ്ങള്‍
മുറ്റത്തു നിന്നും പെറുക്കിയെടുക്കാം..
(ചായയില്‍ ഒരു കുഞ്ഞുറുമ്പുണ്ടായിരുന്ന അന്ന് കട്ടിലിനടിയില്‍ നിന്നാണ് ഗ്ലാസ്സിന്റെ
കഷണങ്ങള്‍ പെറുക്കിയെടുത്തത് ..!!)

അച്ഛന് സ്വര്‍ണ കളറുള്ള കിണ്ണ ത്തിലാണ് ഊണ്
വിളമ്പിയ ചോറിനെ, സ്കെയില് വെച്ച് അളന്നത് പോലെ
കൃത്യമായി പകുതിരിക്കും (മറ്റേ പകുതി അമ്മയ്ക്ക് )
ചോറ് ഉണ്ണുമ്പോള്‍ ഒരക്ഷരം മിണ്ടാന്‍ പാടില്ല
(മിണ്ടിയാല്‍ പിന്നെ ഈര്ക്കിലിയോ ചൂരലോ ആണ് തിരിച്ചു മിണ്ടുക..!! )

അച്ഛന്റെ പകുതി, ഏട്ടന്റെയും അനിയത്തീടെയും ബാക്കി
കറി വെച്ച ചട്ടിയിലിട്ട് എല്ലാം കൂടികുഴച്ചു ഒച്ചയുണ്ടാക്കാതെ
അടുക്കളയില്‍ അടുപ്പിനരികത്തു തന്നെ അമ്മ.
(അമ്മയിപ്പോഴും , എപ്പോഴും പാവം ..!)

ഏതേലും പാത്രത്തില്‍ വിളമ്പി അടച്ചു വെച്ചിട്ടുണ്ടാകും
തിന്നു കഴിഞ്ഞാല്‍ പാത്രം കഴുകി വെച്ചോളണം
തിന്നുന്നതിന് മുന്പ് കയ്യെങ്കിലും കഴുകിയാല്‍ നല്ലതെന്ന് അശരീരി ഉണ്ടാകാം.
(പാതി രാത്രി കേറി വരുന്നവന് ഡിമാണ്ട് പാടില്ല ..!!)

പിന്കുറിപ്പ് :

കപ്പ പറങ്കി പൊടിച്ച പച്ച മോരൊഴിച്ചു
മങ്ങണത്തില്‍ കുടിക്കുന്ന കുളുത്തിനു
നിന്റെ രുചി , മണവും ..!!

*കപ്പ പറങ്കി : പച്ച (കാന്താരി )മുളക്
മങ്ങണം : മണ്ണ് കൊണ്ടുള്ള ഒരു തരം പാത്രം
കുളുത്ത് : പഴങ്കഞ്ഞി

ഓര്‍മ്മ

2011-10-10T14:30:00.001+05:30

കുപ്പി വളകള്‍ അണിയാറുണ്ടോ നീയിപ്പോഴും ?

വള കഷണം ഉള്ളം കയ്യില്‍ വെച്ച് പൊട്ടിച്ചു

സ്നേഹം നോക്കിയാലോ നമുക്ക് ?!!

വലിയ കഷണം പൊട്ടി ബാക്കിയാവുമ്പോള്‍ ,

വിചാരിച്ചത് നിന്നെയാണെന്ന്

സമ്മതിക്കുമ്പോള്‍ , മുഖത്ത് വിരിയാറുള്ള

ആ ചിരി ഒന്നൂടെ കാണണമെന്നുണ്ട് ..!!

പിന്കുറിപ്പ് :

നിന്റെ ഹൈഡ്രജന്‍ ബലൂണുകളോട്,

പച്ചീര്‍ക്കില്‍ വളച്ചു വെച്ച്

കഞ്ഞിപ്പശ കൊണ്ട് ഒട്ടിച്ച ഈ കടലാസ് പട്ടം

എങ്ങനെ മത്സരിക്കാന്‍ ആണ്..?!!

പിറന്നാള്‍

2011-07-30T10:37:00.000+05:30

ജൂലൈ 31 നു മഷിത്തണ്ടിന്റെ രണ്ടാം പിറന്നാള്‍ നാളിതു വരെ മഷിത്തണ്ട് വായിക്കുകയും അഭിപ്രായങ്ങള്‍ പറയുകയും ചെയ്ത എല്ലാ സുഹൃത്തുക്കള്‍ക്കും ഔപചാരികതയ്ക്കപ്പുരത്തെ നന്ദി ഹൃദയത്തിന്റെ ഭാഷയില്‍ അറിയിക്കുന്നു . തുടര്‍ന്നും എല്ലാവരുടെയും സഹകരണം പ്രതീക്ഷിക്കുന്നു ... എല്ലാവര്ക്കും നല്ല ദിവസം ആശംസിക്കുന്നു !!

പിറന്നാള്‍ പ്രമാണിച്ച് കഴിഞ്ഞ പിറന്നാള്‍ മുതലുള്ള, മഷിത്തണ്ടില്‍ എന്നും ചര്ച്ചയാകാറുള്ള പിന്കുരിപ്പുകള്‍ ഒരുമിച്ചു പോസ്റ്റുന്നു !!

വെയിലത്ത്‌ കുറുകി കിടന്നതൊക്കെ
മഴയത്ത് ഒലിച്ചു പോകുമെന്ന് കരുതി,
കൈ വഴികളിലൂടെ പല വഴി
കുത്തിയൊലിച്ചിട്ടും തീര്‍ന്നു പോകുന്നില്ലല്ലോ നീ...

നേരായ വഴിയിലൂടെ ഒരിക്കല്‍ പോലും വരാത്തത് കൊണ്ട്

നിന്നിലേക്കുള്ള ഓരോ കുറുക്കു വഴിയും എനിക്ക് മന പാഠമാണ് !!

ഔപചാരികതയുടെ മെസ്സേജ് കള്‍ എല്ലാം

അയച്ചു തീര്‍ന്നു ഇനി നിനക്കും എനിക്കുമിടയില്‍ നിശബ്ദത മാത്രം !!

പ്രണയം ഇറങ്ങിപ്പോയ നാള്‍ മുതല്‍

എത്ര പെട്ടെന്നാണ് നമുക്ക് സംസാരിക്കാന്‍

വിഷയമില്ലാതായത് ..!!

തറവാട്ടു മുറ്റത്ത്‌ കുട്ടികള്‍ ഇപ്പോഴും കളിക്കുന്നുണ്ട് ,

ചെമ്പക പൂ കമ്മല്‍ ഉണ്ടാക്കി കൊടുക്കാത്തതിനാല്‍

അവരുടെ ഇടയില്‍ ആരും ഇത്രയും കാലം പിണങ്ങാറില്ല പോലും..!!

പോര്‍ട്ടബിലിറ്റി വന്നതില്‍ പിന്നെ

സ്വപ്നങ്ങള്‍ക്കൊക്കെയും നിന്നിലേക്ക്‌

മാറാനാ താല്‍പ്പര്യം..!!!

നിന്നെ കാത്തു നിന്ന വഴിയിലെ

കരിയിലകളെ പോലും ചിതലരിച്ചു തുടങ്ങി

വാഗ്ദാനം ചെയ്ത ഒരു ചുംബനം

ഒന്നിനും തികയാതെ വന്നേക്കും ...

ആ പഴയ ഓട്ടൊഗ്രാഫ് പുസ്തകത്തിലെ

പേജുകളെല്ലാം പൊടിഞ്ഞു പോയിട്ടും

വടിവില്ലാത്ത അക്ഷരത്തില്‍ നീ എഴുതി വെച്ച

വാക്കുകള്‍ ഇപ്പോഴും 'മോണോലിസ ചിരി' ചിരിക്കുന്നുണ്ട്..

ഒറ്റയ്ക്കിരിക്കുമ്പോള്‍

മഴ നനഞ്ഞ ആമ്പലിന്റെ മണമുള്ള

നിന്റെ ഓര്‍മകളുമായി ഒരു നിശാ കാറ്റ്

ഇടയ്ക്കിടെ വന്നു പോകാറുണ്ട്...

വഴിയരികിലെ വളവില്‍

ചിരിച്ചു നില്‍ക്കുന്ന പ്രണയമേ

നിന്റെ പേരും നാളും പറഞ്ഞില്ലെങ്കിലും വയസ്സറിയണം,

മൂപ്പെത്താത്ത എല്ലുകള്‍ക്കുള്ള ഡിമാണ്ട് കുറഞ്ഞിട്ടില്ല ഇതുവരെ ...

പാതിയില്‍ മുറിഞ്ഞ

ഇന്നലത്തെ സ്വപ്നത്തില്‍ നീയും ഉണ്ടായിരുന്നു,

മഴ നനഞ്ഞ വയല്‍ വരമ്പിലൂടെയുള്ള

അറ്റമില്ലാത്ത യാത്രയില്‍....!!

ആര്‍ക്കും കൊടുക്കാതെ പിശുക്കി പിശുക്കി വെച്ച് ,

ഞാന്‍ കെട്ടിയുയര്‍ത്തിയ വാക്ക് കൊട്ടാരം

ഒരൊറ്റ വാക്കിന്റെ ധാരാളിത്തത്താല്‍

തകര്‍ത്ത് എറിഞ്ഞില്ലേ നീ ..

മഴ – മരം , കാട് – കുട

2011-07-11T09:57:00.000+05:30

ഇപ്രാവശ്യം പതിവ് തെറ്റി ;
കണ്ണും കരളും നിറച്ചു മഴ പെയ്തിട്ടും
ഒരു മഴക്കവിത പോലും എഴുതിയില്ല,
പുറത്തേക്കുള്ള വാതില്‍ കൊട്ടിയടച്ചു
ജനല്‍ ചില്ലിലൂടെ മഴയെ നോക്കി
മനോഹരം എന്ന് പറഞ്ഞില്ല !!

മഴ വരും മുന്‍പേ ഞാന്‍ നട്ട
വിത്തുകള്‍ക്കൊപ്പം മഴയെ മുഴുവനായും നനയുകയായിരുന്നു..

അകവും പുറവും ആകെ കുതിര്‍ന്നു പോയിരിക്കുന്നു..
വരും വേനലില്‍ തണുപ്പും കുളിരും നല്‍കേണ്ട
ആര്‍ദ്രതയുടെ വിത്തുകള്‍ മുള പൊട്ടുന്നത്
ഇവിടെ നിന്നായിരിക്കാം…!

മുമ്പ് ആവേശത്തോടെ നനഞ്ഞവരെല്ലാം
കാടായി കുട പിടിച്ചു നില്‍ക്കുന്നുണ്ട് ചുറ്റിലും … !!

പന്തലിച്ചു വന്മരമായില്ലെങ്കിലും,
വലിചെറിഞ്ഞവയും കുഴിച്ചിട്ടവയും ഉറപ്പായും മുളക്കും
ഒരു കുളിരും കുടയും സമ്മാനിക്കും ..!

ഇറങ്ങി വാടോ, മഴ നിലച്ചിട്ടില്ല
നമുക്കൊരുമിച്ചു നനയാം..
പടു മുളയായെങ്കിലും നമ്മളും മുളച്ചാലോ..?!!

പിന്കുറിപ്പ് :
വെയിലത്ത്‌ കുറുകി കിടന്നതൊക്കെ
മഴയത്ത് ഒലിച്ചു പോകുമെന്ന് കരുതി,
കൈ വഴികളിലൂടെ പല വഴി
കുത്തിയൊലിച്ചിട്ടും തീര്‍ന്നു പോകുന്നില്ലല്ലോ നീ...

ബുഫല്ലോ സോള്‍ജ്യര്‍ പരിസ്ഥിതി പതിപ്പില്‍ വന്നത്

വഴികളിലുള്ളത് !!

2011-06-30T13:56:00.000+05:30

നേരത്തെ ഉണരുന്ന രാവിലെകളില്‍,
നിന്നെ എനിക്ക് സമ്മാനിക്കാനല്ലെങ്കില്‍ പിന്നെ
മറ്റെന്തിനാണ് വിട്ടിനടുത്തെ ഇടവഴിയില്‍
ഇലഞ്ഞിയും മുല്ലയും പൂക്കുന്നത് ?

   ഒരൊറ്റയുമ്മ കൊണ്ട് നിന്റെ പിണക്കം
   മാറ്റാനല്ലെങ്കില്‍ പിന്നെയെന്തിനാണ്
   കാവിനുള്ളിലെ വഴിയില്‍ ഇത്ര ഇരുട്ട് ?

കൈകോര്‍ത്തു പിടിച്ചു തോളുരുമ്മി
നടക്കാനല്ലെങ്കില്‍ പിന്നെയെന്തിനാണ്
കുന്നിന്‍ മുകളിലേക്ക് ഈ ഒറ്റയടിപ്പാത ?

   ഒരു സൈക്കിളില്‍ ഒരു വലിയ മഴ
   ഒരുമിച്ചു നനയാനല്ലെങ്കില്‍ പിന്നെ
   പാടത്തിനെന്തിനാണീ ഒറ്റ വരമ്പ് ?

ഇടവഴി റോഡാകുമ്പോഴും
കാവ് പാര്‍ക്ക് ആകുമ്പോഴും
വയല് വീടാകുമ്പോഴും
സങ്കടം തോന്നുന്നത്
പ്രകൃതി സ്നേഹി ആയതു കൊണ്ടല്ല ,
ഇവിടെയൊക്കെ നിന്നെ മറന്നു വെച്ചത് കൊണ്ടാണ് ..

പിന്കുറിപ്പ് :
നേരായ വഴിയിലൂടെ ഒരിക്കല്‍ പോലും വരാത്തത് കൊണ്ട്
നിന്നിലേക്കുള്ള ഓരോ കുറുക്കു വഴിയും
എനിക്ക് മന പാഠമാണ് !!

കുറിപ്പുകള്‍

2011-06-21T12:34:00.001+05:30

വേര് ജീവിതം

ആഴങ്ങളിലെ, ഘനീ ഭവിച്ച ഓര്‍മ്മകള്‍ക്ക് മുകളില്‍
തപസ്സിരിക്കുന്നതല്ല ;
മണ്ണടരുകളില്‍ നിന്നും കാലഘട്ടത്തിന്റെ അറിവിനെ വേര്‍തിരിച്ചെടുത്തു,
തണ്ടിന് കരുത്ത് പകര്‍ന്നു,
പ്രതിലോമതയുടെ കൊടുങ്കാറ്റില്‍ ഉലയാതെ നിര്‍ത്തി;
പുതിയ ബീജത്തിന് ചരിത്രത്തിന്റെ ധമനികളെ
സമ്മാനിച്ച്‌
ഇലകളിലൂടെ വീണ്ടും മണ്ണില്‍ അലിയിക്കുന്നതും കൂടിയാണ് ..!!

ആയിരത്തി ഒന്നാം രാവ്

വെറുമൊരു കഥ പറഞ്ഞു തീരാത്തതിനാല്‍,
ജീവിതം തിരിച്ചു കിട്ടിയ ഒരു കുമാരിയുണ്ട് കഥയില്‍ .
കഥയും കവിതയും സ്വപ്നവും നല്‍കിയിട്ടും
ജീവിതത്തെ തിരിച്ചു കിട്ടാത്തവരാണ് ഇവിടെ പലരും ..!

പിന്‍ കുറിപ്പ് :
ഔപചാരികതയുടെ
മെസ്സേജ് കള്‍ എല്ലാം അയച്ചു തീര്‍ന്നു

ഇനി നിനക്കും എനിക്കുമിടയില്‍ നിശബ്ദത മാത്രം !!

ബോണ്‍ (ബ്ലോഗ്‌ )സായ്

2011-05-11T14:25:00.001+05:30

ചില്ല് കൂട്ടില്‍ വളര്‍ന്ന് ;
കാണുന്നവര്‍ക്കൊക്കെ,
കൌതുകത്തെ മാത്രം 'ജനിപ്പിക്കാന്‍' കഴിയുന്ന
കുഞ്ഞു വിത്തുകള്‍ സമ്മാനിച്ച്‌ ,
പ്രശംസകള്‍ തേടുന്ന
നാരുവേരുകളെ മാത്രം വെച്ച്
പുറം ലോകത്തെ തിരയുന്ന
തായ് വേരുകളെ സൌകര്യ പൂര്‍വ്വം
മുറിച്ചു മാറ്റിയവന്‍... !!

പിന്കുറിപ്പ് :

പ്രണയം ഇറങ്ങിപ്പോയ നാള്‍ മുതല്‍
എത്ര പെട്ടെന്നാണ് നമുക്ക്
സംസാരിക്കാന്‍ വിഷയമില്ലാതായത് ..!!

എന്‍ഡോസള്‍ഫാന്‍ - ഇരകളുടെ രണ്ടു വാക്ക്

2011-05-03T14:07:00.006+05:30

വഴികള്‍ രണ്ടുണ്ട് പച്ച യാഥാര്‍ത്ഥ്യത്തിലേക്കുള്ളതും സ്വപ്ന ലോകത്തിലെക്കുള്ളതും

നിന്റെ 'നീല പല്ലു'കളിലൂടെ "പുതിയ സാധന"ത്തിനു പകരമായി
പച്ച ജീവിതത്തെ ഒരു തവണയെങ്കിലും പകര്‍ന്നു കൊടുത്തതിനു നന്ദി.
നിങ്ങള്‍ നീട്ടി വിളിച്ച മുദ്രാവാക്യത്തിനും ഞങ്ങള്‍ കടപ്പെട്ടിരിക്കുന്നു.

പുതിയ തലമുറയെ സംരക്ഷിച്ച സന്തോഷത്തോടെ ഒരുത്തര്‍ക്കും
ഉയരങ്ങളിലെ സ്വന്തം സ്വപ്നങ്ങളിലേക്ക് കുതിക്കാം,
തിരിഞ്ഞു നോക്കുമ്പോള്‍ ഞങ്ങളിവിടെ തന്നെ ഉണ്ടാകും.

പെയ്തൊഴിഞ്ഞ ദുരന്തത്തിന്റെ
ഒരു വില കുറഞ്ഞ കാരിക്കേച്ചറായി നമ്മളിവിടെ അവശേഷിക്കും.

കണ്ണ് ചിമ്മിയും തുറന്നും നാക്ക് നീട്ടിയും
നടന്നും ഇഴഞ്ഞും അനങ്ങാതെ കിടന്നും
ഇനി ഞങ്ങളും സ്വപ്നം കാണാന്‍ പഠിക്കട്ടെ..!!

കഴിഞ്ഞ ആഴ്ചത്തെ വര്‍ത്തമാനം ആഴ്ചപ്പതിപ്പ് (എന്‍ഡോസള്‍ഫാന്‍ സ്പെഷല്‍ പതിപ്പ് ) ല്‍ വന്നത് .

നൊസ്റ്റാള്‍ജിയ

2011-04-29T12:13:00.004+05:30

അപ്പൂപ്പന്‍ താടി

വളരെ അകലത്തു നിന്നും നിഷ്കളങ്കതയുടെ വിരല്‍ത്തുമ്പിലേക്ക് പാറി വന്നു
സ്നേഹത്തിന്റെ ആര്‍ദ്രതയില്‍, കാത്തു വെച്ച ഒരേ ഒരു വിത്ത് സമ്മാനിച്ച്‌,
ഊതി പറത്തുന്നതിനു മുന്പെയുള്ള ഒരു ചുംബനം മാത്രം തിരിച്ചു വാങ്ങി
കണ്ണില്‍ സന്തോഷത്തിന്റെ പൂത്തിരിയും
മനസ്സില്‍ ഗൃഹാതുരത്വത്തിന്റെ ഓര്‍മകളും
നീയല്ലാതെ മറ്റാര് സമ്മാനിക്കാന്‍ ..?!!

പല്ല് വേദന

വന്നു കഴിഞ്ഞാല്‍ പിന്നെ
മറ്റൊന്നിനെ കുറിച്ചും ചിന്തിക്കാന്‍
അവസരം തരാത്ത
കൂട്ടുകാരിയാണ്‌ നീ ...

പിന്കുറിപ്പ് :
തറവാട്ടു മുറ്റത്ത്‌ കുട്ടികള്‍ ഇപ്പോഴും കളിക്കുന്നുണ്ട് ,
ചെമ്പക പൂ കമ്മല്‍ ഉണ്ടാക്കി കൊടുക്കാത്തതിനാല്‍
അവരുടെ ഇടയില്‍
ആരും ഇത്രയും കാലം പിണങ്ങാറില്ല പോലും..!!

കവല

2011-04-18T14:16:00.004+05:30

പ്രതിമ

ഒന്നിനും പ്രതികരിക്കാതെ നില്‍ക്കുന്നത്
ഉളിയും കരിങ്കല്ലും തമ്മിലുള്ള അനശ്വര പ്രണയത്തിന്റെ
സന്തതികള്‍ മാത്രമല്ല;
പത്തു മാസം ചുമന്നു നൊന്തു പെറ്റവയും
പക്ഷികള്‍ ചെക്കേറാത്ത പ്രതിമകള്‍ ആകാറുണ്ട്, പല അവസരങ്ങളിലും..!!

കൊടിമരങ്ങള്‍

എപ്പോഴും തല ഉയര്‍ത്തി നിവര്‍ന്നു നില്‍ക്കും ,
ഏതു നിറത്തിലുള്ള കൊടികള്‍ ആയാലും
കാറ്റിനനുസരിച്ച് ഇടത്തോട്ടോ വലത്തോട്ടോ പാറും
എന്നാല്‍ ശക്തിയായി കാറ്റടിക്കുമ്പോള്‍
കൊടിമരത്തോട് ചേര്‍ന്ന് നില്ക്കാറാണ് പതിവ് !!

തട്ടുകട

ചായ കുടിക്കാന്‍ ചെന്നാല്‍
ചുവപ്പും വെളുപ്പും കാവിയും പച്ചയും
വേണ്ട രീതിയില്‍ ചേര്‍ത്ത്
"നമുക്ക് വേണ്ടി" ചായ തരുന്ന സ്ഥലം വേറെയില്ല ..!

തിരൂര്‍ ബ്ലോഗ്‌ മീറ്റില്‍ വെച്ച് പ്രകാശനം ചെയ്ത കാ വാ രേഖ യില്‍ നിന്ന്

ഉപമ

2011-04-01T14:22:00.005+05:30

മിതത്വം

കൊമ്പാണോ വാലാണോ ഉള്ളത് എന്നല്ല
ഉമ്മറത്താണോ പൂജാമുറിയിലാണോ എന്നതുമല്ല
ഉള്ളിലെത്ര നിറഞ്ഞിരുന്നാലും ഒഴിഞ്ഞിരുന്നാലും
പുറത്തേക്കൊഴുകുന്നത് തുല്യമാണ് എന്നതാണ് !!

പ്രണയം

അടപ്പ് തുറക്കുന്നേയില്ല എങ്കില്‍
തമ്മിലൊട്ടാതെ എത്ര കാലം വേണമെങ്കിലും
നിന്നെ ഉള്ളില്‍ കൊണ്ട് നടക്കാം..!!

പിന്കുറിപ്പ് :
പോര്‍ട്ടബിലിറ്റി വന്നതില്‍ പിന്നെ
സ്വപ്നങ്ങള്‍ക്കൊക്കെയും നിന്നിലേക്ക്‌
മാറാനാ താല്‍പ്പര്യം..!!!

ആനുകാലികം

2011-03-18T12:22:00.003+05:30

പുനരുദ്ധാരണം

വായു കടക്കാത്ത
വാര്‍പ്പ് മുറിക്കകത്ത്
ശ്വാസം മുട്ടുന്നുണ്ടാവണം
ദൈവങ്ങള്‍ക്ക് ...

രൂപാന്തരണം

സംഭവിക്കുകയാണെങ്കില്‍ ആമയായി മാറാനാണെനിക്കിഷ്ടം...
ഓട്ട മത്സരത്തില്‍ മുയലിനെ തോല്‍പ്പിച്ചത് കൊണ്ടല്ല !
പുറം ലോകത്തെ തീരെ ശ്രദ്ധിക്കാതെ
കൈയും തലയും പരമാവധി ഉള്ളിലേക്ക് വലിച്ചു
അങ്ങനെ കിടക്കാലോ..?!!

പിന്കുറിപ്പ് :
നിന്നെ കാത്തു നിന്ന വഴിയിലെ
കരിയിലകളെ പോലും ചിതലരിച്ചു തുടങ്ങി
വാഗ്ദാനം ചെയ്ത ഒരു ചുംബനം
ഒന്നിനും തികയാതെ വന്നേക്കും ...

ആത്മഗതങ്ങള്‍

2011-02-24T14:03:00.002+05:30

തിരക്ക്

സഖാവേ , ജീവിതം പൊതുവേ തിരക്കിലാണെന്നും
റോഡിലിറങ്ങി മുദ്രാവാക്യം വിളിക്കാന്‍
എനിക്ക് സമയമില്ല എന്നും നിനക്കറിയാമല്ലോ ..?

ആനുകാലിക പ്രശ്നങ്ങള്‍ക്കെതിരെയെല്ലാം
' ഓണ്‍ലൈന്‍' മാധ്യമങ്ങളില്‍ ശക്തമായിത്തന്നെ
പ്രതികരിക്കുന്നുണ്ടെന്ന് ഞാന്‍ പറഞ്ഞില്ലേ ..
നിരവധി കമന്റുകള്‍ അതിനു കിട്ടുന്നുമുണ്ട്.

പിന്നെയും എന്തിനാണ് നിങ്ങള്‍
എന്റെ അടച്ചിട്ട വാതിലില്‍ മുട്ടുന്നത് ..?!!!

വിശ്വാസം

കുറിയുടെയും ലോണിന്റെയും പണമടക്കേണ്ട
അവധി കഴിഞ്ഞ് നാളേറെയായി
ബാങ്കുകാരനും പലചരക്ക് കടക്കാരനും
വീട്ടില്‍ വന്നു അന്വേഷിച്ചു എന്നാ ഭാര്യ പറഞ്ഞത്.
ദൈവമേ.., കഴിഞ്ഞ സംക്രമത്തിനു
അമ്പലത്തിലെ ചില്ല് ഭണ്ടാരത്തില്‍
100 ന്റെ നോട്ടിട്ടത് നീ കണ്ടില്ലെന്നുണ്ടോ ..?!!

പിന്കുറിപ്പ് :

ആ പഴയ ഓട്ടൊഗ്രാഫ് പുസ്തകത്തിലെ
പേജുകളെല്ലാം പൊടിഞ്ഞു പോയിട്ടും
വടിവില്ലാത്ത അക്ഷരത്തില്‍ നീ എഴുതി വെച്ച
വാക്കുകള്‍ ഇപ്പോഴും 'മോണോലിസ ചിരി' ചിരിക്കുന്നുണ്ട്..

നിന്റെ കീശേല് എത്ര കൊരട്ട പിടിക്കും ?

2011-02-16T14:32:00.009+05:30

റോഡ്‌ മ്മന്നു വീണു കിട്ടുന്ന *കൊരട്ട ചുട്ടു തിന്നരുത്.
*വൈന്നേരം , കൈപ്പാടിനിപ്പറത്തെ
രാമേട്ടന്റ *കണ്ടത്തില്‍ *സൊണ്ണ് കളിക്കാന്‍ പോണം,
*ഗോട്ടിക്ക് പകരം കൊരട്ട കൊണ്ട്
സൊണ്ണ് കളിയ്ക്കാന്‍ വിളിക്കണം,
മൂക്കിളിയന്‍ ഗോപു , എന്നെ കൂട്ടാണ്ട്
*രാക്കുണ്ടേ പറക്കിയതെല്ലാം തിരിച്ചു പിടിക്കണം.

ഞായറാഴ്ച അമ്മൂന്റെ എട്ടനേം കൂട്ടി
മാപ്ലേന്റെ പറമ്പില്‍ കൊരട്ട *മാട്ടാന്‍ പോണം.

തൊണ്ട കുത്തുന്ന *കരിചി മാങ്ങ അമ്മൂന്റെ എട്ടന്,
പിളര്‍ക്കുമ്പോള്‍ വായിലെന്ന പോലെ വെള്ളം ചാടുന്ന
പഴുത്ത മാങ്ങ എനക്കും അമ്മൂനും ..

കളിയ്ക്കാന്‍ പോവുമ്പോള്‍ ഇടുന്ന ട്രൌസറിന്റെ
കീശേല് കൃത്യായിട്ട് 23 കൊരട്ട പിടിക്കും.
ഒരു കീശ കൊരട്ടക്ക് മൂന്നുറുപ്യ കിട്ടും,
അത് കൂട്ടി വെച്ചിട്ട് വേണം
വിഷൂനു നൂറു ഉറുപ്യെന്റെ വെടി മേണിക്കാന്‍..!!

പിന്കുറിപ്പ് :

ഒറ്റയ്ക്കിരിക്കുമ്പോള്‍
മഴ നനഞ്ഞ ആമ്പലിന്റെ
മണമുള്ള നിന്റെ ഓര്‍മകളുമായി
ഒരു നിശാ കാറ്റ് ഇടയ്ക്കിടെ
വന്നു പോകാറുണ്ട്...

* കൊരട്ട :കശുവണ്ടി
ഗോട്ടി : ഗോലി
സൊണ്ണ് : ഒരു തരാം നാടന്‍ ഗോലി കളി
രാക്കുണ്ടേ : അതിരാവിലെ
മാട്ടുക : മോഷ്ടിക്കുക
കരിചി മാങ്ങ : മൂക്കാത്ത കശുമാങ്ങ, തിന്നാല്‍ തൊണ്ട കുത്തി ചുമക്കും
കണ്ടം : പാടം
വൈന്നേരം: വൈകുന്നേരം
ഇനിയും അര്‍ഥം കിട്ടാത്തവ ഉണ്ടെങ്കില്‍, ചോദിച്ചാല്‍ പറഞ്ഞു തരുന്നതായിരിക്കും

വര്‍ത്തമാനം ആഴ്ച പതിപ്പില്‍ അച്ചടിച്ച്‌ വന്നത്

ആകാശക്കാഴ്ച

2011-01-19T14:07:00.001+05:30

ആദ്യം ഒരു വലിയ മതിലു കെട്ടണം.
കുറഞ്ഞത്‌ മൂന്നാളുടെ ഉയരം വേണം, മതിലിനു
മുകളില്‍ കമ്പി വേലി കെട്ടി, ബാക്കിയുള്ള സ്ഥലത്ത്
കുപ്പിച്ചില്ല് വിതറണം..
'ആന വലിച്ചാല്‍ തുറക്കാത്ത' ഇരുമ്പ് ഗേറ്റില്‍
'അതിക്രമിച്ചു കയറുന്നവര്‍ ശിക്ഷിക്കപ്പെടും'
എന്ന ബോര്‍ഡു വെക്കണം...
എന്നിട്ട് വേണം ,

നട്ടപ്പാതിരയ്ക്ക് മലര്‍ന്നു കിടന്നു എന്‍റെ മാത്രം
ആകാശം നോക്കാന്‍ ....

പിന്കുറിപ്പ് :

വഴിയരികിലെ വളവില്‍ ചിരിച്ചു
നില്‍ക്കുന്ന പ്രണയമേ
നിന്റെ പേരും നാളും പറഞ്ഞില്ലെങ്കിലും
വയസ്സറിയണം, മൂപ്പെത്താത്ത എല്ലുകള്‍ക്കുള്ള
ഡിമാണ്ട് കുറഞ്ഞിട്ടില്ല ഇതുവരെ ...

നാറാണത്ത്‌ ചിന്തകള്‍

2010-12-21T14:46:00.004+05:30

പുനര്‍ജനി

നീ തന്ന, ആ പഴയ ഗ്രീറ്റിംഗ് കാര്‍ഡ്
ഇന്നലെ വീണ്ടും തുറന്നപ്പോള്‍,
അതിനുള്ളില്‍ നിന്നും രണ്ടു കുഞ്ഞുറുമ്പുകള്‍
വന്നു കൈവിരലില്‍ തൊട്ടു;
ചിതയിലെരിഞ്ഞ സ്വപ്നങ്ങള്‍ക്ക്
തിരിച്ചു വരാനാകുമോ എന്ന് ചോദിച്ചു...

കൊതുക് ബാറ്റ്

ഒരു പരിധിക്കപ്പുറത്തു ചിന്തകള്‍
നിന്നെ ചുറ്റി പറക്കാന്‍ തുടങ്ങിയാല്‍,
മെല്ലെയൊന്നു വീശിയാല്‍ മതി
ഓരോ സ്വപ്നവും നൂറായി
പൊട്ടി തെറിച്ചു ഇല്ലാതാകും..

സൈക്കിളോട്ടം

ടോര്‍ച്ചു വെളിച്ചത്തില്‍
സൈക്കിളോടിക്കുന്നത് പോലെയാണ്
നിന്റെ പ്രണയം,
ദൂരെ വെളിച്ചംകണ്ട് ഒരുങ്ങി നില്‍ക്കുമ്പോഴേക്കും
എന്നെയും കടന്നു അടുത്ത തെരുവിലെത്തിയിട്ടുണ്ടാകും..

പിന്കുറിപ്പ് :
പാതിയില്‍ മുറിഞ്ഞ
ഇന്നലത്തെ സ്വപ്നത്തില്‍ നീയും ഉണ്ടായിരുന്നു,
മഴ നനഞ്ഞ വയല്‍ വരമ്പിലൂടെയുള്ള
അറ്റമില്ലാത്ത യാത്രയില്‍....!!

രണ്ടെണ്ണം

2010-11-24T14:26:00.000+05:30

ഒറ്റപ്പെടല്‍

അടഞ്ഞു കഴിഞ്ഞാല്‍ തുറക്കാന്‍ പ്രയാസമുള്ള
ഒരു കൂട് കൂടെ കൊണ്ട് നടക്കുന്നുണ്ട് എല്ലാവരും ..
അല്ലെങ്കില്‍ പിന്നെ ഇത്ര വലിയ ആള്‍ക്കൂട്ടത്തിലും
നാമെങ്ങനെയാ ഒറ്റപ്പെട്ടു പോകുന്നത് ..?!!

ഇര പിടുത്തം

എല്ലാ കഴുകന്മാരും നാം വിചാരിക്കുന്നതിലും കൂടുതല്‍
ഉയരത്തിലാണ് പറക്കുന്നത്
ഇരകള്‍ എപ്പോഴും തയ്യാറായി
നിലത്തു തന്നെ കാണും...

പിന്കുറിപ്പ് :

പേമാരി നനഞ്ഞ മുറ്റത്ത്‌ വെയില് പരക്കാന്‍
തുടങ്ങിയപ്പോള്‍ ഒരു മുക്കുറ്റി ചിരിച്ചു നില്‍പ്പുണ്ട് ...

കുടുംബം

2010-09-24T15:41:00.003+05:30

അച്ഛന്‍

പുതിയ കാര്‍ ഷെഡ്‌ നു,
അവസാനത്തെ ചട്ടി കോണ്‍ക്രീറ്റ് വീഴുന്നത് വരെ
മുറ്റത്തിന്, അച്ഛന്റെ
മണമായിരുന്നു !!

അമ്മ

ഏറ്റവും ഒടുവില്‍ തൊട്ടു നക്കാന്‍ മാറ്റിവെക്കുന്ന
ഒരു വിരല്‍ അച്ചാറിനാണോ
ആദ്യം പിഴിഞ്ഞോഴിക്കുന്ന ചെറുനാരങ്ങയ്ക്കാണോ
അമ്മയുടെ സ്വാദ് ?!!

പെങ്ങള്‍

കോളേജിലെ ഈ വര്‍ഷത്തെ
സിലബസ് അറിയില്ലെങ്കിലും
വോഡഫോണിന്റെ എല്ലാ പ്രീ പെയ്ഡ് പ്ലാനുകളും
മനപാഠം തന്നെ !!

പിന്കുറിപ്പ്:

ആര്‍ക്കും കൊടുക്കാതെ പിശുക്കി പിശുക്കി വെച്ച് ,
ഞാന്‍ കെട്ടിയുയര്‍ത്തിയ വാക്ക് കൊട്ടാരം
ഒരൊറ്റ വാക്കിന്റെ ധാരാളിത്തത്താല്‍
തകര്‍ത്ത് എറിഞ്ഞില്ലേ നീ ..

രണ്ടു നുറുങ്ങുകള്‍

2010-09-07T21:58:00.003+05:30

സൂചിക്കണിയാന്‍

ഇത് വരെ ഒരാളെയും കുത്തി നോവിച്ചിട്ടില്ല
ഒരു സ്വപ്നത്തെയും തുന്നി ചേര്‍ത്തിട്ടുമില്ല ;
എങ്കിലും സൂചി കണിയാന്‍ എന്ന് തന്നെയാ
എല്ലാരും വിളിക്കുന്നത്‌ ..!!

വിറക്

തമ്മില്‍ ഒരു ശത്രുതയും ഇല്ലാതിരുന്നിട്ടും എന്നും
വെട്ടി മുറിച്ചു കൊണ്ടിരിക്കുന്ന മഴുവിനോട്
എന്ത് പരാതി പറയാന്‍ ...?!!

പിന്കുറിപ്പ് :
ഒളിച്ചു വെക്കപ്പെട്ട പ്രണയമേ...
നീയിനി കത്തുകളയയക്കേണ്ടതില്ല.
നീ പോസ്റ്റ്‌ കാര്‍ഡില്‍ മാത്രം എഴുതുന്നത്‌ കൊണ്ടും,
തപാല്‍ക്കാരന്‍ വായാടിയായതിനാലും
നാട്ടുകാരറിഞ്ഞതിനു ശേഷമേ ഞാനറിയുന്നുള്ളൂ, എന്തും ..!!

പ്രണയാസ്തമയം

2010-08-10T22:47:00.000+05:30

എന്തിനായിരിക്കും നമുക്കിടയില്‍
ഇണക്കവും പിണക്കവും ഇതളുകളായി
ഇന്നലെയുടെ കറുത്ത പൂക്കള്‍ വിടര്‍ന്നത് ?
സങ്കല്‍പ്പ കഥകളുടെ ചതുപ്പ് നിലങ്ങളില്‍ പതിഞ്ഞ
ആദ്യ കാല്‍പ്പാടുകള്‍ ആരുടെതായിരിക്കും
എന്റേതോ, അതോ നിന്റേതോ ....

ഇന്ന് നിനക്ക് ചിരിക്കാന്‍
എന്റെ കുരുടന്‍ കിനാക്കളുണ്ട്
നാളെ നിനക്ക് മറക്കുവാന്‍
നമ്മള്‍ ഒത്തു ചേര്‍ന്ന നിമിഷങ്ങളുണ്ട്‌
മനസ്സിന്റെ ഇരുണ്ട ഇടനാഴികളില്‍
ഓര്‍മ പിശാച് നിഴലുകളെ പിന്തുടരുമ്പോഴും
നീയെന്ന സ്വപ്നത്തെ
യാഥാര്‍ത്ഥ്യമാക്കാന്‍ മോഹിച്ചു പോയത്
എന്റെ തെറ്റ്

തെറ്റും ശരിയും ആപേക്ഷികമെന്നു അച്ഛന്‍
തെറ്റില്‍ നിന്നാണ് ശരിയുണ്ടാകുന്നതെന്ന് അമ്മ
ഇതിലേതാണ് ശരിയെന്നറിയാതെ
ഇവര്‍ക്ക് പറ്റിയ തെറ്റായ ഞാന്‍

ഇനി നമുക്ക് ചിരിക്കാം ...
എന്തെന്നാല്‍
പ്രണയത്തിന്റെ സിംഫണി എന്തെന്നറിഞ്ഞവരാണ് നാം
ഇനി നമുക്ക് പിരിയാം...
പിരിയാനുറച്ച വേളയില്‍ നിന്റെ സ്വപ്നത്തിന്റെ തൂവലുകളില്‍
ഒന്നെനിക്ക് തരിക
ഹൃദയ രക്തത്താലെന്റെ , മനസ്സിലെ നിന്റെ ചിത്രങ്ങള്‍ക്ക്
അടിക്കുറിപ്പുകള്‍ എഴുതട്ടെ ഞാന്‍ ...

സുഹൃത്തും സഹപാഠിയും ആയ ജിതിന്റെ , ഏറ്റവും ഒടുവില്‍ പ്രസിദ്ധീകരിച്ച കവിത.
ബംഗ്ലൂരില്‍ പഠനത്തിനിടെ ഹൃദയ സംബന്ധിയായ അസുഖം വന്നു നമ്മെ വിട്ടുപോയ ജിതിന്റെ ഓര്‍മ്മകള്‍ക്ക് ഈ ആഗസ്ത് 12 നു രണ്ടു വയസ്സ് തികയുകയാണ് .
പോളി ടെക്നിക് കോളേജ് മാഗസിനില്‍ പ്രസിദ്ധീകരിച്ചതാണ് ഈ കവിത .
ജിതിന്റെ ഓര്‍ക്കുട്ട് പ്രൊഫൈല്‍ ഇവിടെയും ഓര്‍ക്കുട്ട് കംമുനിട്ടി ഇവിടെയും കാണാം
സുഹൃത്ത് ടോണി ജോണ്‍, ജിതിനെ കുറിച്ചെഴുതിയത്‌ ഇവിടെ വായിക്കാം

പിറന്നാള്‍

2010-07-29T23:06:00.002+05:30

ഈ ജൂലൈ 31 നു എന്റെ ബ്ലോഗെഴുത്തിനു ഒരു വയസ്സ് പൂര്‍ത്തിയാവുകയാണ് . നാളിതു വരെ മഷിത്തണ്ട് വായിക്കുകയും എഴുത്തിനെ അകമഴിഞ്ഞ് പ്രോത്സാഹിപ്പിക്കുകയും ചെയ്ത എല്ലാ സുഹൃത്തുക്കള്‍ക്കും എന്റെ നന്ദി അറിയിക്കുന്നു.
തുടര്‍ന്നും എല്ലാവരുടെയും സഹകരണങ്ങള്‍ പ്രതീക്ഷിക്കുന്നു....

പിറന്നാള്‍ പ്രമാണിച്ചു മഷിത്തണ്ടിലെ ആദ്യത്തെ 2 പോസ്റ്റുകള്‍ റീ പോസ്റ്റ്‌ ചെയ്യുന്നു
സ്നേഹ പൂര്‍വ്വം
ഉമേഷ്‌ പിലിക്കോട്

ഒറ്റ നോട്ട്

ഒരിടത്തൊരിടത്ത് ഒരു കണ്ണുണ്ടായിരുന്നു
നേരിനു നേരെ തുറന്ന് തെറ്റിനെ ചൂണ്ടി കാണിക്കുന്ന
കണ്ണ്
വര്‍ത്തമാനത്തിന്റെ കരിമ്പുകയെറ്റ്‌ മഞ്ഞളിക്കാന്‍
തുടങ്ങിയപ്പോള്‍
ഇന്നലെ അതിനെയരോ
ഒരു ഒറ്റ നോട്ടില്‍ പൊതിഞ്ഞെടുത്തു

കളഞ്ഞു പോയ പ്രണയം

വഴിയരികിലെ തിരക്കില്‍ കൈവിട്ടു പോയ
പ്രണയമേ...

ജീവിതത്തിന്റെ
ഏതൊക്കെ ഇടവഴികളില്‍
നിന്നെ പ്രതീക്ഷിച്ചു
എന്നിട്ടും കണ്ടെത്താനായില്ലല്ലോ
ഇതുവരെ....

കാത്തിരിപ്പ്

2010-07-25T10:46:00.002+05:30

പുതിയ പാര്‍ക്കര്‍ പെന്നും പിടിച്ചു ഒന്നര മണിക്കൂര്‍ ഇരുന്നിട്ടും
കവിത വരാത്തത് കൊണ്ട് അതിന്റെ നിബ്ബ് ഒടിച്ച് കളഞ്ഞു !!
അപ്പോഴാ പാര്‍ക്കിലേക്ക് വരണമെന്ന് പറഞ്ഞു നീ വിളിച്ചത് ...

എന്റെ പൊന്നേ.. നീ ഒന്ന് വേഗം വന്നേക്കണേ;
ഞാനിവിടെ നിന്നെയും കാത്തിരിക്കാന്‍ തുടങ്ങിയിട്ട്
അര മണിക്കൂര്‍ കഴിഞ്ഞു !!!

പിന്കുറിപ്പ് :
മഴ ചതിച്ചില്ല ;
ഇത്തവണയും റോഡിലെ
ടാറിംഗ് കൃഷി നൂറുമേനി കൊയ്യും !!!

ഓന്തുകള്‍

2010-07-05T00:03:00.002+05:30

ഉച്ചവെയിലില്‍ കുപ്പായമിടാതെ
കളിക്കാനോടുമ്പോള്‍ മുത്തശ്ശി പറയും,
ചെമ്പക ചോട്ടിലെ ഓന്ത്
പൊക്കിളില്‍ നോക്കി ചോര കുടിക്കും എന്ന്.
ചെമ്പക ചോട്ടില്‍ ഓന്തിനെ കാണുമ്പോള്‍
അതിന്റെ ചുവന്ന കഴുത്ത് കാണുമ്പോള്‍
പൊക്കിളും പൊത്തി നിന്നിട്ടുണ്ട് പല തവണ...!!

ചെമ്പകവും മുത്തശ്ശിയും ഉച്ചവെയിലിലെ കളിയും;
എല്ലാം മറഞ്ഞെങ്കിലും ...
ഓന്തുകള്‍ ഇപ്പോഴുമുണ്ട് ...!!

ബസ്സിനുള്ളിലും, നാല്‍ക്കവലകളിലും
ഇടവഴിയിലുമെല്ലാം ...
ഒരല്പം ചോരയുള്ള ശരീരം കണ്ടാല്‍
നോക്കി നോക്കി ചോര വലിച്ചൂറ്റുന്ന ഓന്തുകള്‍ !!!

പിന്കുറിപ്പ് :

അരിയുടെയും പെട്രോളിന്റെയും വില കൂടിയതല്ല
എനിക്കിപ്പോ പ്രശ്നം,
മണി അഞ്ചു ആയിട്ടും നിന്റെ മിസ്സ്‌ കാള്‍ വരാത്തതാണ് ...!!!

മൂന്നു ജന്മങ്ങള്‍

2010-06-30T23:24:00.003+05:30

നിന്റെ തെറ്റിനെയും അബദ്ധങ്ങളെയും മായ്ച്ചു
തേഞ്ഞു തേഞ്ഞു തീരാനൊരു ജന്മം

നന്നായി എഴുതാന്‍ കൂര്‍പ്പിച്ചു കൂര്‍പ്പിച്ചു
ഇല്ലാതായ രണ്ടാമത്തെ ജന്മം

വെട്ടിയും തിരുത്തിയും അവസാനം ചവറ്റു കോട്ടയിലേക്ക്
വലിച്ചെറിയാന്‍ മൂന്നാമത്തെ ജന്മം

സ്വപ്നങ്ങള്‍

2010-06-22T18:47:00.003+05:30

പല സ്വപ്നങ്ങളെയും നാം അറിയാറെയില്ല!!!

ഉറക്കത്തെ പോലും അറിയിക്കാതെ ,
ഒട്ടും പിടി തരാതെ അതങ്ങനെ പൊയ്ക്കളയും...!!

മറ്റു ചില സ്വപ്‌നങ്ങള്‍ നമ്മെ പേടിപ്പെടുത്തി എഴുന്നെല്പ്പിക്കും,
ആ സമയത്തെ ഞെട്ടലും ഹൃദയമിടിപ്പും,
ചിലപ്പോള്‍ മണിക്കൂറുകളോളം ബാക്കിയാകുകയും ചെയ്യും..!!!

എന്നാല്‍,
വിളിച്ചുണര്‍ത്തപ്പെട്ടതിനാല്‍
മുറിഞ്ഞു പോകുന്ന സ്വപ്നങ്ങളുണ്ടാകാറുണ്ട്;
കണ്ണുകള്‍ ഇറുക്കിയടച്ചു സ്വപ്നത്തെ
നമ്മുടെ വഴിക്ക് കൊണ്ടുവരാന്‍ നോക്കും

അവസാനം തോല്‍വി സമ്മതിച്ചു
എണീറ്റ് മുഖം കഴുകി വന്നിരിക്കുമ്പോഴേക്കും,
ഒന്നും ഓര്‍മ്മ‍യിലുണ്ടാകുകയുമില്ല !!

പിന്കുറിപ്പ് :

കൂട്ടുകാരീ
നീ എന്റെ സ്വപ്നമാണെങ്കിലും
ഏതു ഗണത്തില്‍പ്പെടുത്തണം നിന്നെ...!!!

പ്രതീക്ഷ

2010-06-10T18:33:00.003+05:30

നിന്റെ പ്രണയത്തിനു
പുതിയ ബ്ലേഡിന്റെ മൂര്ച്ചയുണ്ടാകുമ്പോള്‍
അസ്ഥികള്‍ ഉള്ളത് ഒരു പ്രതീക്ഷ തന്നെയാണ് ..!!
മുറിയുന്നത്‌ , തൊലിപ്പുറം പോലുമറിയാതെ
രക്തക്കുഴലുകളെയും പേശികളെയും മുറിച്ച്,
ആഴത്തിലേക്കിറങ്ങി; വെളുത്ത
അസ്ഥി തുളക്കാന്‍ കഴിയാതെ ,
പല്ല് കൊടുന്ന രീതിയില്‍
പോറലുകള്‍ ഏല്‍പ്പിക്കുമ്പോള്‍
അസ്ഥികള്‍ ഉള്ളത് ഒരു പ്രതീക്ഷ തന്നെയാണ് .!!!
അതും മുറിച്ചു ഒരു സായന്തന കാറ്റ് പോലെ
ഇറങ്ങി പോവില്ലല്ലോ നീ....!!!

പിന്കുറിപ്പ് :

നെറ്റിയിലും മാറത്തും കൈവെള്ളകളിലും
ചെറു തുള്ളികള്‍ കൊണ്ട് ഉമ്മ വെക്കുകയും,
ആയിരം കൈകളെറിഞ്ഞു വാരി പുണരുകയും,
ഒടുവില്‍ ഓര്‍മയുടെ
ഒരു നനുത്ത സ്പര്‍ശം മാത്രം ബാക്കിയാക്കി
അകന്നു പോവുകയും ചെയ്യുമ്പോള്‍,
കൂട്ടുകാരീ....
നീ മഴയല്ലെങ്കില്‍ പിന്നെയെന്താണ് ?

മഴ നനയല്‍

2010-05-25T13:02:00.002+05:30

മഴ നനയണം ;
നനയുമ്പോള്‍,
ഇടിമുഴക്കത്തില്‍ ഒരു ചുമരെങ്കിലും
വിണ്ടു കീറണം!
മിന്നലെറിയുമ്പോള്‍ ഒരു നിമിഷമെങ്കിലും
കാഴ്ച പോകണം!!
കാറ്റത്ത്‌ ഒരു മരമെങ്കിലും പിഴുതെറിയണം!!!
അല്ലെങ്കില്‍ പിന്നെ
എന്നെത്തെയും പോലെ
ഷവറിലെ കുളി മാത്രമാവും ഈ
മഴക്കാലവും.!!!

പിന്‍ കുറിപ്പ് :

പ്രണയമേ ,
ഒരു സിം കാര്‍ഡിലും
ചെറുതായി നിനക്ക് ചുരുങ്ങാന്‍
പറ്റുമോ ?!!

രണ്ടു കുറിപ്പുകള്‍

2010-04-22T16:11:00.001+05:30

പച്ച മധുരാ, കപ്പേ, ചെനയാ,

പച്ച മധുരാ, കപ്പേ, ചെനയാ,
ഊമ്പിക്കുടിയാ, ഗോമാവേ...
നിങ്ങളുടെയെല്ലാം മാങ്ങ മണം ആണത്രേ
ഈ വേനല്‍ കാല നൊസ്റ്റാള്‍ജിയ !!!

പൂട്ടും താക്കോലും

ഏതു ,
പാതി രാത്രിയിലോ
നടുച്ചയ്ക്കോ വന്നാലും
താക്കോലിട്ടു നന്നായൊന്നു
തിരിച്ചാല്‍ , ഒച്ചയുണ്ടാക്കാതെ
തുറന്നു കൊടുക്കണം എല്ലാം ...

വന്ന കാര്യം കഴിഞ്ഞു
തിരിച്ചു പോകുമ്പോഴും
അകത്തെ കുറിച്ച് പുറത്ത് അറിയിക്കാതെ
പൂട്ടി വെക്കണം എല്ലാം ...

പിന്കുറിപ്പ് :
രക്തത്തെയും വിയര്‍പ്പിനെയും
നന്നായറിഞ്ഞിട്ടും മനസ്സിനെ അറിയാതിരുന്ന
കൂട്ടുകാരീ
വെറുതെയല്ലല്ലോ നിന്നെ തൂവാല എന്ന് വിളിക്കുന്നെ !!

മീനുകള്‍

2010-04-03T13:21:00.001+05:30

ഉറക്കത്തിലും ഉണര്‍വിലും കണ്ണ് തുറന്നിരിക്കുന്നുന്ടെങ്കിലും
രണ്ടു തരത്തിലുണ്ട്

അറിവിന്റെ (അജ്ഞതയുടെ ) ആഴങ്ങളില്‍ തപസ്സിരിക്കുന്നവരും,
അതെ ആഴങ്ങളുടെ മുകളില്‍ നീന്തി തുടിക്കുന്നവരും

ആദ്യത്തെ വിഭാഗം ആരെയും ഒന്നും ചെയ്യാറില്ല ;
എന്ത് പറഞ്ഞാലും ചെയ്താലും...

എന്നാല്‍

രണ്ടാമത്തെ വിഭാഗം വളരെ സെന്സിബിലാണ്
അത് കൊണ്ട് തന്നെ എളുപ്പത്തില്‍ വലയിലാകുകയും ചെയ്യും
എന്നാലും മൃദുവായി ചെതുമ്പലുകള്‍ കളയുക മാത്രമേ ചെയ്യാറുള്ളൂ

വളരെ ആഴത്തില്‍ ചെന്ന് പിടിക്കുന്നവയെ
തോലുരിക്കുക തന്നെയാണ് പതിവ്

മൂന്നു കുറിപ്പുകള്‍

2010-03-25T13:11:00.003+05:30

സൂചി

നീ കൂടെയുണ്ടെങ്കില്‍
കത്രിക എങ്ങനെ മുറിച്ചാലും
പ്രശ്നമില്ല ;
നിന്നെയൊഴിച്ചു !!

ടോര്‍ച്ച്

വഴി കാണാനല്ല ;
വഴി നടക്കുന്നവനെ കാണാന്‍ !!

നൊസ്റ്റാള്‍ജിയ

മുക്കാലും തേഞ്ഞ
ഹവായി ചെരുപ്പ് തന്നെയാണ്
ഇപ്പോഴും എന്റെ
നൊസ്റ്റാള്‍ജിയ !!!

പിന്കുറിപ്പ് :
നിന്റെ ഹൃദയം
ഒരിക്കലും തുറക്കുന്നില്ലെങ്കില്‍ ,
വാതിലിനു പകരം ചുമര് വെച്ച് തന്നെ
പണിതാല്‍ മതിയായിരുന്നു ........

പൊതുവേ

2010-02-22T20:07:00.002+05:30

മഴ

രാത്രി പുലരുവോളം ആര്‍ത്തലച്ചു പെയ്താലും

അറിയാറില്ല;

രാവിലെ ഒന്നോ രണ്ടോ മരം പെയ്താല്‍ പോലും

നന്നായി നനയുന്നിണ്ടിപ്പോള്‍...!!!

പേടി

ഇത്രയൊക്കെ ഉപദ്രവിച്ചിട്ടും നിന്നെ

തിരിച്ചൊന്നു കടിക്കുക പോലും ചെയ്യാത്തത്

നിന്നെ പേടിയായത് കൊണ്ടല്ല ;

ഇവിടെ നിന്നും അനങ്ങിയാല്‍ ചൂടും തണുപ്പും

വിശപ്പും കാഴ്ചയുമില്ലാത്ത ഈ ലോകം നഷ്ടപ്പെടും

എന്നുള്ളത് കൊണ്ട് തന്നെയാണ്...

പിന്കുറിപ്പ് :

എന്നില്‍ നിന്നും ഇറങ്ങിപ്പോയ ഈ ഇടവഴി

നിന്നെ തിരിച്ചു തരില്ലെന്നറിയാം എങ്കിലും

ഈ വഴിയെത്തുമ്പോള്‍ ഹൃദയമിടിപ്പിന്റെ താളം കൂടാറുണ്ട്

വെറുതെ ....

പ്രിയ വാലന്റൈന്‍ ........

2010-02-16T17:33:00.001+05:30

ഓ പ്രിയ വാലന്റൈന്‍ ,
നിനക്കൊരു വയസ്സു കൂടി .......

      നിന്‍റെ
      ഓര്‍മ്മകള്‍ക്ക് വയസ്സായതിനാല്‍
      വൃദ്ധ സദനത്തിലാക്കിയിട്ടുണ്ട് എല്ലാത്തിനെയും
    ഗര്‍ഭത്തിലെ അലസിപ്പോകുന്നതിനാല്‍
    സ്വപ്നങ്ങളെ കുറിച്ച് പരാതിയെയില്ല

വിശേഷിച്ചു ഒന്നും സംഭവിച്ചില്ലെങ്കിലും
പ്രിയ വാലന്റൈന്‍ ,
കുറച്ചു മണിക്കൂരുകലെങ്കിലും എന്തിനാ

നീയെന്റെ ഹൃദയമെടുത്ത് പെരുമ്പറ കൊട്ടിയത് ....

തിരിച്ചറിവ്

2010-01-18T18:51:00.001+05:30

കഥയില്‍ ചോദ്യമില്ല

കവിതയിലും ...

ചോദ്യങ്ങളെല്ലാം ജീവിതത്തിലാണ് !!!

ഉത്തരങ്ങള്‍

നേരത്തെ അറിയാമായിരുന്നിട്ടും

നിന്നിലേക്കുള്ള വഴികള്‍

തെറ്റിയതിനാല്‍

വിജയിച്ചിട്ടില്ല പ്രണയത്തിലും....!!!

നീ നല്ല വഴി നടക്കാനാണ്

ചെളിയാനെന്നരിഞ്ഞിട്ടും അതിലേക്ക്

മാറി നിന്നത്

പക്ഷെ നിന്‍റെ വഴിയും തെറ്റിപ്പോയത്

ആരെ നേര്‍വഴി നടത്താനാണ് .....??!

ഇടത്തരക്കാരന്റെ ജീവിതം

2010-01-02T14:17:00.003+05:30

ഇടത്തരക്കാരന്റെ ജീവിതം കുഴിയാനയുടെ
കുഴി പോലെയാണ് മിനുസമുള്ളതും മനോഹരവും ,
എന്തെന്നാല്‍
എത്ര പൊത്തിപ്പിടിച്ചു കയറിയാലും
ഒരു മണല്‍ത്തരി കൊണ്ടുള്ള ഏറു മതി...........

പിന്കുറിപ്പ് :
നേരിട്ടും ഫോണിലൂടെയും സംസാരിക്കുമ്പോള്‍
നമുക്കിടയില്‍ ഏറി വരുന്ന ഈ
മൌനത്തെ ഏതു പേരിട്ടു വിളിക്കണം ?
പ്രണയമെന്നോ അതോ ........?!!!!!!!!

സത്യം

2009-12-17T19:43:00.001+05:30

കണ്ണാടി

സത്യം മാത്രം വിളിച്ചു പറയുന്നതിനാല്‍

നിന്നെ ആണിയടിച്ചു ചുമരില്‍ തൂക്കി

മൊബൈല്‍

പറയുന്നതില്‍ പാതിയും കള്ളമാനെന്നരിഞ്ഞിട്ടും

നിനക്കിപ്പോഴും ഹൃദയത്തിനു മുകളില്‍ തന്നെയാണ് സ്ഥാനം

പിന്കുറിപ്പ് :

ഉറക്കം നഷ്ടപ്പെടുന്നതില്‍ എനിക്ക് വേവലാതി ഉണ്ട്

നിന്നെ കാണാനുള്ള സ്വപ്‌നങ്ങള്‍ കൂടി ഇല്ലാതാവുന്നതിനാല്‍.........

നിങ്ങളുടെ കണ്പോലകളില് ഉറുമ്പ് കടിച്ചിട്ടുണ്ടോ എപ്പോഴെങ്കിലും ?

2009-12-10T18:55:00.001+05:30

നിങ്ങളുടെ കണ്പോലകളില് ഉറുമ്പ് കടിച്ചിട്ടുണ്ടോ എപ്പോഴെങ്കിലും ?

എന്നെ കടിച്ചിട്ടുണ്ട് ഒരു കട്ടുറുമ്പ്
ആദ്യം അല്പം നീട്ടലുണ്ടാകും ,ചെറിയ ഒരു വീക്കവും
കാഴച്ചയ്ക്ക് ചെറിയ പ്രശ്നം തോന്നും
രണ്ടു നാള് കഴിഞ്ഞാല് ശരിയാകുകയും ചെയ്യും
അപ്പോഴും
അമ്മയെയും പെങ്ങളെയും അവരായിത്തന്നെ കാണും
ഇടതിനെ ഇടതായും വലതിനെ വലതായും തന്നെ തോന്നും
വീര്തതായി തോന്നിയിട്ടില്ല വാര്ത്തകളെ
പക്ഷെ എനിക്കിപ്പോള് മനസ്സിലാകാത്തത്
ദിവസമെത്ര കഴിഞ്ഞാലും
കാഴ്ചകളെ മറച്ചും, പെരുപ്പിച്ചും കാണിച്ച്
നിങ്ങളുടെ കണ്ണുകളില് കടിച്ചു തൂങ്ങിയിരിക്കുന്നത്
എന്താണെന്നതാണ് ..........?

എഴുത്ത്

2009-12-08T09:37:00.001+05:30

നല്ല വെളുത്ത കടലാസില്‍

കറുപ്പായും പച്ചയായും നീലിച്ചും ചുവന്നും

പല നിറത്തില്‍ ;

വൃത്തത്തിലും ചതുരത്തിലും

തലങ്ങനെ വിലങ്ങനേയും

നീട്ടിയും കുറുക്കിയും പലതവണ

എഴുതി നിറച്ചു.

എന്നിട്ടും വായിക്കാന്‍ പാകത്തില്‍

തെളിയാന്‍ തുടങ്ങിയിട്ടില്ലത്രേ .....!!!

പിന്‍ കുറിപ്പ് :

ഈ ലോകത്ത് നിന്നും ഞാനൊഴിച്ച്‌ എല്ലാവരും

അപ്രത്യക്ഷരാകണം കാരണം തനിച്ചിരിക്കുമ്പോള്‍ മാത്രമാണ്

ഞാന്‍ നിന്നെ ഓര്‍ക്കുന്നത്

കയ്യേറ്റം

2009-11-29T11:18:00.003+05:30

ഏതു കൂരിരുട്ടിലും നക്ഷത്രങ്ങളെ കാണാന്‍ പറ്റുമെങ്കിലും

എപ്പോഴും ഓടിക്കയറാന്‍ പറ്റുന്ന ഒരു വീടെനിക്കുണ്ടായിരുന്നു
പക്ഷെ ഇന്നലെ എനിക്ക് മുന്‍പേ ഓടിക്കയറിയ കാറ്റും മഴയും
ഇറങ്ങി പോയിട്ടില്ല ഇത് വരെ....

മൂന്ന് കവിതകള്‍

2009-11-14T13:11:00.001+05:30

കൂട്ടുകാരി

എന്നെ പരിചയപ്പെട്ടതിനു
സൂര്യനോടും മലനിരകലോടും നന്ദി പറഞ്ഞ
ഒരു കൂടുകാരിയുണ്ടായിരുന്നു
നേരം ഇരുട്ടിയിട്ടും മഞ്ഞു പരന്നിട്ടും
മേഘത്തിന്റെ ഉള്ളില്‍ നിന്നും കണ്ടെത്താനായില്ല ഇത് വരെ ....

കട്ടുറുമ്പ്

നിന്റെ ഓര്‍മ്മകളും
കട്ടുറുമ്പും ഒരു പോലെയാണ്
ചെറിയ ഒരു അവഗണന മതി
ദിവസങ്ങള്‍ നീളുന്ന
നീറ്റലുകള്‍ സമ്മാനിക്കാന്‍.......

ഇഷ്ടം

ഇത് വരെ നേരിട്ട് കണ്ടിട്ടില്ലാത്തതിനാല്‍
നിന്നെ ഇഷ്ടമാണെന്ന് പറയാന്‍
ഒരു മടിയുമില്ല എനിക്ക് ...

ഉരുള്‍ പൊട്ടല്‍

2009-10-27T14:31:00.003+05:30

നിന്നോട് പറയാന്‍ ധൈര്യമില്ലാതിരുന്ന പ്രണയം
എന്നെ ശ്വാസം മുട്ടിക്കാന്‍ തുടങ്ങിയപ്പോഴാണ്
വായു കടക്കാന്‍ ചെറിയൊരു ദ്വാരമിട്ടത് ...
ഇന്ന് കടമെടുത്ത ധൈര്യവുമായി വന്നപ്പോഴേക്കും
പറയാന്‍ ഒന്നും ബാക്കിയുണ്ടായിരുന്നില്ല
എല്ലാം ആ ദ്വാരത്തിലൂടെ.......

രമണന്‍

2009-10-20T14:41:00.001+05:30

ഇന്നലെ കൈയ്യിലെടുത്ത പുതിയ പുസ്തകം
പകുതി വായിച്ചപ്പോഴേക്കും നിന്നെ മണത്തു ;

അന്വേഷിച്ചപ്പോള്‍

പലരും ചവച്ചു തുപ്പി, കാലൊടിഞ്ഞ
രാക്കിലാണ് നീ എന്നറിഞ്ഞു;

അരികുകള്‍ ചിതല്‍ തിന്ന് ,കുത്തഴിന്ജ്‌ അങ്ങനെ....

ഇനി

ഒരിക്കല്‍ കൂടി നിന്നെ വായിക്കണ....

എഴുത്തിനെ രുചിക്കുന്നതിന്റെ
ആദ്യ പാഠങ്ങള്‍ പഠിപ്പിച്ചതിനാല്‍
മറക്കാനാവില്ലല്ലോ നിന്ന......

ഉയിര്‍ത്തെഴുന്നേല്‍പ്പ്‌

2009-10-16T14:20:00.001+05:30

കാണുവാന്‍
കണ്ണിനുള്ളിലെക്കും
വായിക്കുവാന്‍
വരികള്‍ക്കിടയിലെക്കും
ഇറങ്ങി ചെന്നവന്‍
മൂന്നാം നാളുപോലും
കല്ലറയില്‍ നിന്നും
എഴുന്നേറ്റിട്ടില്ല

മറവി

2009-10-12T16:47:00.001+05:30

തല വച്ചിടത്ത്‌ വാലെത്തുമ്പോള്‍
എല്ലാം മറന്നു പോകുന്നു
എന്നതായിരുന്നു ആക്ഷേപം
തലയും വാലും മറന്നു വച്ചെതെവിടെയേന്നാ
ഞാന്‍ പരതുന്നെ.....

ഇഷ്ടം

2009-09-26T14:30:00.001+05:30

ചായം തേക്കാത്ത കൈവിരലുകളുടെ

മനോഹാരിത കണ്ടപ്പോഴാണ്‌

നിലാവിനേക്കാള്‍ നേര്‍ത്ത

എന്‍റെ ഹൃദയം നിനക്ക് തന്നത്

എന്നിട്ടും

നഖ മുനകളുടെ മൂര്‍ച്ച പരിശോധിക്കനാണല്ലോ

നീയിഷ്ടപ്പെടത്‌....

നിലനില്‍പ്പിന്റെ തത്വ ശാസ്ത്രത്തിലേക്ക്

2009-09-23T14:34:00.008+05:30

ഇരുട്ട് കടന്നു വരുന്നു
മെല്ലെ,
താള നിബിടമായി...
വിപ്ലവം വായടിത്തമല്ലെന്ന തിരിച്ചറിവില്‍
ശാന്തി തീരങ്ങളിലേക്ക്
ഒരു വെടിച്ചില്ല്..!!
സ്വതന്ത്ര്യവും സമയവും നഷ്ടപ്പെട്ട
ലോകത്ത് നിന്നും
പ്രകൃതിയിലേക്ക് ഒരു ഇറങ്ങി നടപ്പ്‌...

കുരുടന്‍ കിനാക്കളുടെ ബാല്യം...
യൌവ്വനം നനവുള്ള ഒരോര്‍മ...

ഇടമുറിഞ്ഞ വാക്ക്‌...
പൂരിപ്പിക്കലിന്റെ വ്യര്‍ത്തത...

അറ്റ് പോയ വിരലുകളെ തേടുന്ന വീണ...

പ്രണയത്തിന്റെ ആരാഷ്ട്രീയതയ്ക് മേല്‍
ഭോഗസക്തിയുടെ തീ നാമ്പുകള്‍
പടര്‍ന്നു കയറുമ്പോള്‍
കൊലോനിയളിസതിന്റെ
മരം പെയ്ത്...

നഷ്ടപ്പെടാതെ നേടിയെടുക്കലില്ല
എന്നാ തിരിച്ചറിവുണ്ടാകുമ്പോള്‍
വീണ്ടും കൊതിക്കുന്നു
കുഴിച്ചു മൂടിയാലും
തളിര്‍ക്കുന്നവയ്ക് വേണ്ടി...!!!

പ്ലാവ്

2009-09-23T14:13:00.004+05:30

തനിയെ മുളച്ചു,
വെയിലത്ത്‌ ഉണങ്ങിയും
മഴയത്ത്‌ തളിര്‍ത്തും
താനെ വളര്‍ന്നു
പലപ്പോഴും പശു തിന്നിട്ടുണ്ട് ,
തലതന്നെ....!!
ഇന്നലെയാണ്‌ കണ്ണുകളില്‍
ആശ്ചര്യം ഞാന്‍ കണ്ടത്‌
തടി അളക്കാന്‍ കൈകള്‍
മതിയാവാതെ വന്നപ്പോള്‍
ഇന്ന് ചുറ്റും വേലി വന്നു
നാളെ ഞാന്‍ കോടാലിക്ക്
സ്വന്തമാവുകയാണ് പോലും...

മോഷ്ടാവ്

2009-08-04T11:15:00.002+05:30

എന്നും വാതിലടച്ചാണ് കിടക്കരുള്ളത്
ആരും മുട്ടിവിളിക്കുകയോ കുത്തിപ്പോളിക്കുകയോ
ചെയ്യാറില്ല എന്നിട്ടും
ഭദ്രമായി അടച്ചു വെച്ചിട്ടുള്ള ഹൃദയത്തെ മാത്രം
എന്നും ആരോ
കട്ടെടുക്കുന്നു.....

ഇറേസര്‍

2009-08-03T18:17:00.002+05:30

നിന്‍റെ കയ്യിലുള്ള ആ ഇറേസര്‍

ഒന്നെനിക്ക് തരുമോ ?

എന്‍റെ മനസ്സിലെ നിന്‍റെ ചിത്രങ്ങളെ മായ്ക്കുന്നതിനാണ്

നീ മായ്ച്ചത് പോലെ മായ്ക്കാന്‍

എനിക്ക് സാധിക്കുന്നില്ല

ഒന്നും....

പതിവ്‌

2009-08-03T14:04:00.002+05:30

പതിവ്‌

വീട്ടിലെ എന്റെ ഒറ്റ മുറി
ഓര്‍മ്മകള്‍ കൊണ്ടു നിറഞ്ഞതാണ്
ബാല്യത്തിന്റെ കൗമാരത്തിന്റെ
പ്രണയത്തിന്റെ
വിപ്ലവത്തിന്റെ
വിരഹത്തിന്റെ
കവിതയുടെ
സൌഹൃദത്തിന്റെ
പക്ഷെ ഈയിടെയായി
പലപ്പോഴും താക്കോല്‍
മറന്നു പോവുകയാണ് പതിവ്‌

കളഞ്ഞു പോയ പ്രണയം

2009-08-01T14:22:00.003+05:30

വഴിയരികിലെ തിരക്കില്‍ കൈവിട്ടു പോയ
പ്രണയമേ...

ജീവിതത്തിന്റെ
ഏതൊക്കെ ഇടവഴികളില്‍
നിന്നെ പ്രതീക്ഷിച്ചു
എന്നിട്ടും കണ്ടെത്താനായില്ലല്ലോ
ഇതുവരെ....

ഒറ്റ നോട്ടു

2009-07-31T15:51:00.004+05:30

ഒറ്റ നോട്ടു